要贏就一齊贏！

股市博奕，較多人講的是跟莊家博奕，從而又引伸出一系列技術分析，例如留意成交、價格異動，代表莊家、春江鴨預先做嘢，只要洞悉先機，就可以鱷口偷金云云，當然用倒後鏡睇或講就容易，關鍵係，呢套嘢能否不斷複製，普通老散響無內幕消息的情況下，十次可以偷到幾次雞，幾多次可以全身而退？

然而，我覺得要同市場博奕，直接對象唔係莊家，應該係大股東及管理層，從企業行為（Corporate actions）搵出一些蛛絲馬跡，總之大股東與管理層要搵錢，我地就搭程順風車，始終老散跟莊家關係，多少有些零和關係，如果個個老散都賺，莊家食風咩，相對地，跟大股東及管理層博奕較易得到雙贏。

今次想講係股權激勵，簡言之，上市公司通過授出購股權、獎金、股票來激勵管理層提升公司業績，通常在特定年期內達到某些指標或審核，公司會向指定人士發放獎勵。論印象最深刻，不得不提2011年4月同仁堂科技（01666）建議的獎勵計劃（通告連結），這個計劃真是一個「旗幟鮮明」的分錢計劃，只可惜當時無注意到，錯失了賺錢機會，但自此股權激勵的威力亦種在我心，給我上了寶貴一課。

話說只要業績增長率達到某個目標，同仁堂科技的管理層就可以分得某個比例的獎金，可謂多賺多送：

利潤目標增長率 ─ 提取百分比
1. 低於10% ─ 無
2. 10%到15%之間 ─ ≤ 1.5%
3. 15%到20%之間 ─ ≤  3%
4. 20%到25%之間 ─ ≤ 6.5%
5. 25%到30%之間 ─ ≤ 11%
6. 30%到40%之間 ─ ≤15%
7. 40%或以上        ─ ≤18%

計劃如此著數，公司連年賺錢自然不會意外。業績顯示，自2012年至2015年公司先後發放了281.8萬元人民幣、296.7萬元人民幣、364.8萬元人民幣及387.2萬元人民幣的獎金予管理層，而期內盈利增速介乎16.9%至29.6%。至於大家至關心的股價又如何？

2011年5月底，同仁堂科技收報3.595元，至2013年8月最高升至14.3元左右，短短一年多時間將近升3倍。當然，公司期間分拆同仁堂國藥（08138）上市都是股價上升的催化劑，但不能否認的是，管理層在制度激勵之下，挖空心思幫公司諗計賺錢提高效益，分拆子公司上市等連串動作，亦可以解釋為獎勵制度的結果。

最近發現有兩間國企先後公布了股權激勵計劃，各具特色，不排除是同仁堂科技的翻版，至於什麼公司等過兩日再講。